La còca dels Reis vegetala

Per plan començar l’annada, e se vos demòra l’enveja de manjar tornarmai, vos propausi una recèpta de las bonas, plena de bon sucre e de bon gras : la còca dels Reis a la frangipana. Se compausa d’una crèma d’amètla e d’una crèma pastissièra, embarrada entre doas pastas fulhetadas…

Los ingredients :

-2 pastas fulhetadas

-1 fava

crèma d’amètla :

-125 g de sucre

-60 g de margarina mòla

-150 g de polvera d’amètlas

-2 culhièras de ròm

-20 g de fecula de milh

-80 ml de beguda d’amètla

crèma pastissièra :

-la mitat d’una culhièra de fecula de milh

-10 g de sucre

-50 ml de beguda d’amètla

Debanament :

1. Cal confeccionar la crèma pastissièra. Metre los ingredients d’aquela dins una caçairoleta e la butar sul fuòc pichòt. S’arrestar pas de mesclar fins a çò que la crèma s’espessisca. Daissar de caire lo temps que refregisca.

2. La crèma d’amètla. Dins un bòl bèl, apondre la margarina e la foetar amb lo sucre. I apondre lo demai dels ingredients e plan mesclar per que totes aqueles sián plan amalgamats.

3. Quand la crèma pastissièra es freja, la mesclar amb la crèma d’amètla, e l’estirar sus una de las pastas fulhetadas. Cobrir amb l’autra pasta sens doblidar d’i botar una fava ! Amb la punta d’un cotèl, dessenhar de formas polidas o pas (çò mai aisit d’o faire abans de cobrir la còca, sus la pasta aplatussada sus un plan de trabalh). Metre la còca dins lo refrigerator pendent 30 minutas.

4. Precalfar lo forn a 200°. I botar la còca e baissar la temperatura a 180°. Faire còire pendent 30 / 40 minutas.

5. S’i pòt estalar, per faire brilhar la còca, un siròp. Per aquò, faire fondre 20g de sucre amb 20 ml d’aiga dins una caçairoleta. Ónher amb un pincèl sus la còca a la fin de la coseson e tornar enfornar pendent 5 minutas !

Bon profièch !

Marlèna Longelin e la còla