Julia-P La vila d’Agde en Erau se tròba a l’extremitat sud de la cadena dels volcans d’Auvèrnha. Es ligada a una activitat volcanica que se debanèt entre 250.000 e 750.000 ans. Las primièras erupcions se serián produchas en mitan marin e las darnièras en mitan terrèstre.
Entre lo Cap d’Agde e Agde, un ancian volcan, lo mont Sant-Lop testimòni d’aqueles periòdes, culmina a 113 mètres e s’espandís sus quasi 15 km². Es el qu’a donat a la ciutat d’Agde sa color grisa irisada e sos monuments en basalt.
Sètz curioses de descobrir aquel volcanisme ?
Vos conselhi una polida passejada d’una ora, sul caminòl d’Emilia, per dominar la vila d’Agde. Vos menarà al costat nòrd del mont Sant-Lop ; i trobaretz un panoramà esplendid de la region tota : l’estanh de Taur, Seta, Cap d’Agde e lo rèire-païs.
Se sètz amators de cabussada, podètz tanben descobrir aquel volcanisme e sos tresaurs jos l’aiga.
Una colada basaltica se pòt veire a nautor de la plaja de la conca, plaja negra, constituida de bocins basaltics, amb al sud lo rocàs « dels dos fraires », e a l’oèst, l’iscleta negra de Brescon. De paisatges excepcionals de colors contrastadas, entre 0 e 5 mètres de prigondor, que presentan una vida sosmarina fòrça rica.
Julia Pastor e la còla
Passejada : AGDE ciutat volcanica
Adieu Julia,
Nos organisas una passejada, o una cabussada ?
Malgrat un an passat a la Calandreta Dagtenca, ai mancat aquela particularitat de las bèlas!
çaquelà, aviái remarcat las colors dels bastiments ;-).
Ausiguèri parlar de la plaja nègra mercé a un reportatge de France 3, mas i soi pas jamai anat.
Apondut a ma tièra!
++