Julia-P Lo polit concèrt de Manu Théron es vengut claure, dissabte lo 11 de setembre al Musèu Dagtenc Jules Baudou, l’Estiu Occitan de 2021.
Mas l’Estiu Occitan de qu’es aquò ?
L’Estiu Occitan, es una programacion estivala e festiva imaginada pels musèus de la vila d’Agde en partenariat amb lo CIRDÒC – Centre internacional de recèrca e de documentacion occitanas. Es una mesa en lum de la lenga e de la cultura occitanas a travèrs una seria de rencontres, conferéncias, animacions e concèrts.
Per aquela edicion de 2021 los amoroses de la lenga an agut l’astre de descobrir o tornar descobrir un fum d’artistas. Per la musica, an participat lo trio vocal « Aqueles », lo grop « Choc Gaël », amai « Juliette Minvielle solo », musicaira e visitaira de las lengas qu’espanta lo mond amb d’aires italians, tradicionals occitans o per de cants arabs.
L’Estiu Occitan es tanben de rencontres d’autors. L’autritz-vinhairona Catherine Bernard explòra los camins de travèrsa que l’an menada del jornalisme als mestièrs del vin. Fa un retrach sens cap de concession de la viticultura d’uèi. Puèi Michel Piquemal nos venguèt presentar son libre Les mots en occitan.
Per aquela darnièra serada, èra lo torn del musician Manu Théron de nos venir presentar sas musicas popularas de Mediterranèa, portairas d’esperança. Le tombeau suspendu, nom de son darnièr album, nos torna als cants d’un còp èra dins son solò de votz e tambors. Una celebracion d’aquesta Mediterranèa desclausonada que nos desliura la passion e la fervor que sas melodias an portadas dusca als nòstres ribatges. Manu Theron acompanhat d’un bendir o d’un pandeiro venguèt tornar traçar amb jòia e voluptat, los percors d’aqueles cants sens s’enebir res, del raggamuffin a la classica napoletana, del cant sefarade a las musicas occitanas. Le tombeau suspendu fa omenatge al tresòr anonime de las musicas popularas de Mediterranèa.
Una bèla serada de tancadura venguèt acabar aquela edicion de l’Estiu Occitan 2021 que foguèt un còp de mai una capitada. Vos disi doncas a l’an que ven per viure e partejar un Novèl Estiu Occitan en Agde !
« Belhs m’es l’estius el temps floritz quan l’auzelh chanton sotz la flor»
Jaufre Rudèl
Julia Pastor e la còla
