Versalhas, tiratz-vos Brageirac arriba !

Venceires del terren de Peiregús 1 a 0 en ochena de finala, Brageirac balha una partida abotida contra una còla stefanenca sens creativitat ofensiva. Los verds capitan pas de trapar lo camin del fialat e s’ensorran. Çò parièr en campionat, dins una partida tancada que mestrejan lo balon mas capitan pas de tafurar una defensa Brageiraguesa en plaça, menada per Yoann Wachter en bèla forma la partida tota.

Meteis scenari al retorn dels vestiaris, lo gardian Pierre Laborde-Turon s’illustra amb d’arrèsts somptuoses, el qu’a totjorn pas pres lo mendre gòl aprèp uèit encontras pendent aquesta copa de França. La partida s’estrambòrda a la 76ena minuta, Camara capita pas de desempachar corrèctament lo balon que demòra dins la susfàcia de reparacion, l’intrant Romain Escarpit ne profeita e dubrís la marca pel BPF (1-0, 76^ena). Moment d’immensa jòia e de partatge entre lo public vengut en nombre. Una lusor d’esper se perfila e balha d’alas a l’equipa. Brageiraqueses multiplican las escasenças d’agravar lo resultat. Romain Escarpit, encara, après aver escafat Paul Bernardoni, arriba pas de clavar a qualques mètres dels fialats. A la 90ena minuta, Tressens redreiça pas sufisentament sa tòca. Los stefanencs semblan cansats fàcia a l’equipa soudada e collectiva. 

Que de fresiments dins aquesta fin de partida clafida de suspens ! Los peiregordins s’empreissan en quart e jonhon al torn seguent Versalhas !

Composicions : 

Brageirac (4-3-3) : Laborde – Ducros, Letiévant, Mingoua, Wachter – Elissalt, Fachan, Dumai (Gyeboaho, 85^e) – Sahibeddine (Tressens, 75^e), Bakir (Escarpit, 68^e), M’laab (Beltran, 68^e).

Entrainaire : Erwan Lannuzel.

Sant-Estève (3-4-3) : Bernardoni – Nadé, Kolodziejczak, Camara – Maçon (Benkhedim, 84^e), Diousse (Thioub, 67^e), Gourna (Nordin, 46^e), Youssouf (Dieye, 79^e), Diousse – Aouchiche (Moueffek, 67^e), Boudebouz, Bouanga. 

Entrainaire : Pascal Dupraz. 

Melania Issartier e la còla.