Ma descobèrta de la region bordalesa

Quand sètz calandrin de la còla Aprene 1, fasètz d’estagis e remplaçaments dins diferentas calandretas d’Occitània tota. 

Ieu me trobèri en region bordalesa. Foguèt l’escasença de descobrir aquela polida region en tres setmanas que coneissiái pas, pendent mon temps liure. 

D’en primièr, anèri visitar lo centre vila de Bordèu. Prenguèri lo tramvia de la gara Sant-Joan cap a l’Esplanada de Quinconces e lo monument als girondins, de mancar pas ! Anèri a l’ofici de torisme de la vila per saupre çò que podiái visitar. M’aconselhèron l’autocari toristic que fasiá lo torn del centre de Bordèu en una ora.  Aprèp, anèri cap a la poncha Sant-Miquel en naut de la glèisa que culmina a 114 mètres amb un punt de vista sus la vila tota.

Quin plaser de descobrir tota l’arquitectura dels bastiments, del pòrt de Bordèu, dels ancians cais d’aquesta vila e subretot Garona amb los batèls que pòdon acostar al centre de Bordèu.

La dimenjada seguenta, lo dissabte, anèri visitar la Duna de Pilat. Montèri las marchas tot en naut d’aquela granda Duna de sabla per trobar d’un costat los bòsques landeses e de l’autre costat Bassin d’Arcaishon amb un grand punt de vista sus la còsta girondina d’un costat pro salvatja.

Aicí lo temps s’arrèsta. Me trapèri solet, lo cap voidat, amb qualques gotas de pluèja a contemplar lo paisatge de naut, la natura, escotar l’ocean rajar sus la còsta e marchar dessús la Duna pendent longtemps solet.

Lo dimenge, anèri visitar l’Estuari de Gironda per un bèl temps ensolelhat que Garona e Dordonha, dos flumes se’n van dins Ocean Atlantic. L’anèri visitar del costat girondin, Verdon sus Mar. Podretz agachar un punt de vista a 180 grases amb Ocean Atlantic a esquèrra e Estuari de Gironda a drecha. Un batèl fa lo ligam entre lo costat girondés, lo Verdon e lo costat charantés per la vila de Roian que podètz prene vòstra veitura dins lo batèl per anar del Verdon cap a Roian en dètz minutas.

Los qu’an lo mal de mar, de s’absténer !

Guilhèm Arbiòl e la còla