Milena-G Plan venguts dins las fargas del sègle XIXen. Es un endreit meravilhós de la comuna de Montgalhard. Seretz aculhits pel Felip que se ditz Zeze. Vos presentarà lo martèl bèl que se bota en accion pel molin d’aiga, qu’es d’unes que foncionan encara en França.
De son nom « Farga a martinet », a gardat l’aspèct d’origina e fonciona encara a l’ora d’ara amb un ambient misteriós.
Auretz l’impression de viure un jorn d’un còp èra, una immersion totala per cada sens : un espectacle gigant pels uèlhs, una vibracion per las aurelhas amb lo son de l’aiga e del martèl que fan vibrar lo còr e lo còs entièr, lo fresc de la farga e al meteis temps la calor del fuòc del carbon que calfa lo fèr, una emocion bèla de s’imaginar lo mond que trabalhavan aquí.
En mai d’aquò, auretz l’istòria dels fargaires en lenga occitana ! Auretz l’astre d’ausir lo Felip cantar en occitan « La farga de Canillo » e atanben « La polcà del cocut ». Partiretz en viatge istoric dins aquelas fargas de Foish.
Continuaretz lo polit viatge amb la vida de Baptiston, un òme de 85 ans que conta son camin de vida a la nena Marion. Una istòria plan mesa en scèna per un espectacle interactiu que vos cabussa dins las annadas 1900. Emai auretz lo plaser d’ausir la polida melodia de la cançon « Pometa ».
Passaretz pel musèu per i descobrir los mestièrs de bèl temps i a amb una colleccion de 5000 aisinas e objèctes. I veiretz las aisinas dels rèires per l’ostal, los vestits, los esclòps , per l’agricultura…
Seretz en immersion dins una escòla de las annadas 1900 per tornar descobrir los pupitres, la tinta, las plumas per una letra.
Poiretz ensajar lo mestièr de panieraire, tant enfants coma adultes, per i faire de trenatges d’amarinas e partiretz amb la vòstra òbra.
Vaquí un pichon resumit de la nòstra sortida amb l’escòla de Pàmias la setmana passada. Vos aconselhi d’i anar passar una jornada tota per çò que i a encara lo forn a pan, lo cercaire de pampalhetas d’aur, lo mèstre veirièr e mantuna causa encara…
Milena Galinier e la còla
