Sandrina-R Ua annada mei shens hestejar Carnaval ? Nani ! A l’escòla paulina, lo mot qu’èra en totas las bocas despuish ua bèra pausa.
L’efervescéncia que comencè dejà en començar de setmana, lo tèmi qu’estó causit : augan, lo carnaval que seré roi e jaune ! Los calandrons que hasón mustra d’ua gran imaginacion. Suber eròis, ninjàs, parpalhons, princessas, cavalèrs, pompièrs, dontaires de herums e tanben las pastilhas hèra conegudas dab chocolat e cacauèt. Dab los de GS e CP que fabriquèm maracàs, rojas e jaunas entà poder har un drin de brut.
La ploja que’s convidè a la hèsta, mes, nat chepic, qu’esperèm ua esclarida lo vrèspe, dab paciéncia, tà’n poder profieitar com cau. A tres òras, los bancs qu’èran installats a la cort e lo Sent-Pançard de carton prèst tà la cremacion. Los calandrons que s’assedón a mesura en esperar l’arribada deu famós personatge. Los de CM1 e CM2 qu’aprestèn lo procès: lo jutge, los avocats, los gendarmas, Sent-Pançard, Carronha, que i èran tots. Per torn, los avocats de l’acusacion que fustiguèn lo copable presumit. Que l’arcastèn mantun mau : la Covid, lo praubèr, la pollucion deu planeta… L’acusat qu’ensagè de’s deféner dab l’ajuda de l’avocat de la defensa, mes ne s’i escadó pas e que s’estimè mei d’escapà’s. Que s’enseguí ua corruda dab Sent-Pançard e los gendarmas qui ensagèn de gahà’u, devath los crits e las esclaqueradas deus mainats. Lo procès qu’estó plan aprestat peus calandrons e la lor prestacion qu’estó saludada peu public.
Qu’assistim a la tradicionau cremacion de Sent-Pançard, la de la soa reproduccion de carton, plan segur. Qu’èra plan installat suu lheit, connectat au son ordinator. Un beròi tribalh deus calandrons e deus animators periescolars. Lo copable que s’esvaní com hum dab los chepics deus mainats escriuts sus tròç de papèr. Quauques cantas que clavèn aqueth vrèspe hestiu. Carnaval que ns’auherí ua bèra bohada !
Sandrina Rei e la còla
